لەتیف نێروەیی

توركیا چی لە یەكێتی و سلێمانی دەوێت؟

  2020-09-20 17:06      126 جار بینراوە        کۆمێنت

دەستپێك:
لەم لێكۆڵینەوە زانستییەدا، راڤەكردن و هەڵسەنگاندنێكی بابەتیانە دەكەین لەهۆكارەكانی تێكچوونی پەیوەندیی و ئاسایی نەبوونەوەی لەنێوان توركیاو یەكێتی، هەڕەشەكانی توركیا لەسێمانی، بۆئەوەی بزانین هۆكارەكانی تێكچوونی پەیوەندییەكانیان چییە؟ و بۆچی توركیا ناخوازێت پەیوەندییەكانی خۆی لەگەڵ یەكێتیدا ئاسایی بكاتەوە؟
ئایا سلێمانی هەڕەشەیە لەسەر ئاسایشی توركیا، یان ئامانجێكی دیكە لەپشت تارماییەكانی بەهانەو هەڕەشەكانی توركیاوە خۆی مەڵاسداوە؟
توركیا لەڕووی (سەربازیی، هەواڵگریی، ئابووریی، سیاسی) بەشێوەیەك رەگی لەهەرێمی كوردستاندا داكوتاوە كە كلیلی زۆربەی ژوورەكانی ئەو ماڵە بەدەست توركیاوەن! كامە ژووری بەدڵی بێت دەرگاكەی دەكاتەوەو كامە ژووریشی بەدڵ نەبێت، بە داخراوی دەیهێڵێتەوە.
سەرۆكی توركیاش نایشارێتەوەو بەئاشكرا دەڵێت: «هەرێمی كوردستان ماڵی خۆمانەو بۆ چوونە ناو ماڵی خۆمان، پێویستیمان بەپرسكردن و وەرگرتنی رەزامەندیی هیچ كەس و لایەنێك نییە».
هەر لایەنێكیش بیركردنەوەو جیهانبینی لەگەڵ خواست و سیاسەتی توركیادا لە هەرێم و ناوچەكە هاوتەریب نەبێت، ئەوا بەچاوی ناحەزەوە مامەڵەی لەگەڵدا دەكات ، بە هاوكارو یارمەتیدەری (پەكەكە) و مەترسی بۆ سەر سەقامگیریی توركیا تۆمەتباری دەكات، یەكێك لەو لایەنانەش ی.ن.ك-ە.
تۆمەتەكانی توركیاو بێدەنگیی یەكێتی
هەموو جارێك كە بەرپرسە باڵاكانی توركیا بەڕەسمی دەستی تۆمەت بۆ یەكێتی درێژدەكەن و سلێمانی بەمەترسی دەزانن بۆسەر ئاسایشی وڵاتەكەیان، ئەو پرسە دەبێتە مژارێكی گەرمی میدیاو شرۆڤەكارە سیاسییەكان، بەتایبەتیش لەباشووری كوردستان، رەنگە یەكێتی تاكە لایەن بێت كە كەمترین قسەی هەبێت لەسەر بابەتەكە.
بەڵام بێدەنگیی یەكێتی، بەو مانایە نایەت كە تۆمەتەكانی توركیا راستبن، یان بەو تۆمەتانە قایل بێت، بەڵكو بەو مانایە دێت كە یەكێتی نایەوێت بەهۆی وەڵامدانەوەوە، تێكچوونی پەیوەندیی نێوان هەردوولا زیاتر روو لەهەڵكشان بكات، بەڵام دەیەوێت بەسیاسەتێكی نەرمەوە مامەڵە لەگەڵ هەڵوێستە توندەكانی توركیادا بكات و خاویان بكاتەوە، كە پێدەچێت ئەم سیاسەتەی یەكێتی بژاردەیەكی گونجاوبێت، چونكە هەندێك شرۆڤەكاری سیاسی لەو بڕوایەدان كە بۆ هێزە سیاسییەكانی هەرێمی كوردستان، خۆپارێزیی باشترە لەدژایەتیكردنی ئەو وڵاتە، دۆستایەتیكردنیش لەسەر بنەمایەكی نا هاوسەنگەو بەمانای جێبەجێكردنی ئەجێندای ئەو وڵاتە دێت لەناوچەكەدا.
یەكێتی و ئاسایشی توركیا
پرسیارە جەوهەرییەكە ئەوەیە، ئایا یەكێتی و سلێمانی كەوتوونەتە ژێر كونتروڵی (پەكەكە)وە و مەترسین بۆ سەر ئاسایشی توركیا؟ بەبێ سێ و دوو، وەڵامەكەی یەكێتی بۆ ئەو پرسیارە، (نەخێر) دەبێت، بەڵام لەسەر ئەو پرسە، كەمتەرخەمی و خەوشەكەی یەكێتی لەوەدایە كە هەوڵی ئەوەی نەداوە بە بەڵگەوە بیسەڵمێنێتكە نە سلێمانی لەژێر كونتروڵی قەندیلەو نە یەكێتیش هەڕەشەیە لەسەر توركیا، بۆیە پێویستە یەكەم هەنگاوی یەكێتی بۆ بەتاڵكردنەوەی باڵۆنی تۆمەتەكانی توركیا خستنەڕووی بەڵگەنامەكان بێت.
بەڵگەنامەكان چین؟ تۆمەتەكان لەسەر شاخی قەندیلەو دەبێت قەندیل وەكو بەڵگەنامە بەرای گشتی توركیا ئاشنا بكرێت.
قەندیل لەنێوان توركیاو یەكێتی
بەرپرسانی توركیا هەمیشە كە باس لەمەترسییەكانی قەندیل بۆسەر ئاسایشی وڵاتەكەی خۆیان دەكەن، بەشێوەیەك قسەدەكەن كە قەندیل لەناوجەرگەی سلێمانیدا بێت، ی.ن.ك -یش هەوڵی ئەوەی نەداوە كە شاخی قەندیل وەكو سنوورو هەڵكەوتەی جوگرافی بۆ رای گشتی بەتایبەتی بۆ شەقامی توركیایی پێناسە بكات، بۆئەوەی بزانن قەندیل چەند كیلۆمەتر لەسنووری توركیاوە دوورە؟ چەند كیلۆمەتر لەسلێمانییەوە دوورە؟ چەند كیلۆمەتر لەهەولێرەوە دوورە ؟
هەروەك كەمتەرخەمبووە لەوەی كە رای گشتی ئاشنا بكات بەوەی كە قەندیل لەگەڵ كام دەڤەردا هاوسنوورە؟، چونكە نەك لە توركیا، بەڵكو بەشێك لەجەماوەری هەرێمی كوردستان و تەنانەت بەشێك لەجەماوەری یەكێتیش پێناسەیەكی وردیان لەسەر قەندیل نییە.
قەندیل لەڕووی هەڵكەوتەی جوگرافییەوە هاوسنوورە لەگەڵ (پارێزگای سلێمانی، پارێزگای هەولێر، كۆماری ئیسلامیی ئێران)، واتە ناكەوێتە ناو قووڵایی پارێزگای سلێمانییەوە، هەروەها تەنها هاوسنوور نییە لەگەڵ پارێزگای سلێمانی.
–شاخی قەندیل (206) كیلۆمەتر لەناوەندی شاری سلێمانییەوە دوورە، هەروەك لە قەندیلەوە تا دەگاتە ناوشاری سلێمانی، هیچ بنكەو بارەگایەكی پەكەكە-ی لێ نییە.
–لەبەرامبەردا لەقەندیل-ەوە تا سنووری توركیا، دوورییەكەی تەنها (120-130) كیلۆمەترێك دەبێت، چونكە لە قەندیل-وە تا (سیدەكان) دوورییەكەی تەنها (91) كیلۆمەترە، واتە بەجیاوازیی نزیكەی (80-90) كیلۆمەتر قەندیل لەتوركیاوە نزیكترە لەوەی لەناو شاری سلێمانییەوە نزیك بێت، ئەمە جگەلەوەی چەندین بنكەو بارەگای پەكەكە دەكەونە ئەو ناوچانەی كە دەكەونە نێوان قەندیل و سنووری توركیا.
–هەروەها لە قەندیل-ەوە تا ناو شاری (هەولێر) دوورییەكەی (165) كیلۆمەترە.
بەپێی ئەم بەڵگەنامانە بێت، نەك هەر قەندیل زۆر نزیكترە لەسنووری توركیا بەبەراورد لەگەڵ سلێمانی، بەڵكو جیاوازییەكە (80-90) كیلۆمەتر دەبێت.
پەكەكەو كۆنترۆڵكردنی سلێمانی
سەبارەت بەناوچەكانی ژێر كرنترۆڵی (پەكەكە)، وەزیری دەرەوەی توركیا رایگەیاند كە زیاتر لەهەزار گوندی (باكووری عیراق) مەبەستەكەی هەرێمی كوردستانە لەژێر دەستی (پەكەكە )دان، سەرچاوە فەرمییەكانی هەرێمی كوردستانیش، ئاماژە بە (800) گوندی هەرێمی كوردستان دەكەن كە بەهۆی رێگرییەكانی (پەكەكە)وە بێ بەشكراون لە خزمەتگوزارییەكان.
بابزانین لەو هەزار گوندەی وەزیری دەرەوەی توركیا باسیان دەكات ، چەندیان دەكەونە بناری قەندیل و سنووری سلێمانی؟ لەو (1000) گوندە، تەنها (67) گوند لەوانە دەكەونە بناری قەندیل.
ئەو (67) گوندەش بەسەر سنووری پارێزگای سلێمانی و پارێزگای هەولێردا دابەش دەبن، كە (36) لەو گوندانە سەربە پارێزگای سلێمانین و (31) گوندەكەی دیكەی بناری قەندیل دەكەونە سەر پارێزگای هەولێر.
ئەگەر ئەو ژمارەیەی كە وەزیری دەرەوەی توركیا لەدوا پەیامیدا كە تایبەت بوو بەپرسی (پەكەكە) لەهەرێمی كوردستان رایگەیاند‌و دەڵێت: «زیاتر لە 1000 گوند لەژێر دەسەڵاتی (پەكەكە)دان، تەنها %6.7 ی ئەو گوندانە لەدەڤەری (قەندیل)ە، ئەگەر لەو رێژەیەش (31) گوندەكەی سەربە پارێزگای هەولێرن جیابكەینەوە، ئەوا رێژەی ئەو دێهاتانەی سنووری پارێزگای سلێمانی كە لەژێر دەسەڵاتی (پەكەكە)دان، لەكۆی گوندەكانی دیكەی هەرێمی كوردستان، تەنها %3.6 گوندەكان دەكەونە سنووری پارێزگای سلێمانییەوە.
بەم پێودانگە بێت، ئەگەر مەترسییەكانی بوونی (پەكەكە) لەهەرێم بۆسەر توركیا بەڕێژەی سەدیی دیاری بكەین، تەنها %3.6 ئەو مەترسییانە لەسنووری سلێمانییە.
بەڵام ئەگەر رێژەی سەدیی لەو (800) گوندە وەربگرین، كە سەرچاوە رەسمییەكانی حكومەتی هەرێمی كوردستان ئاماژەی پێدەدەن، ئەوا لەو (800) گوندە، تەنها (36) لەو گوندانەی بناری قەندیل دەكەونە سنووری پارێزگای سلێمانییەوە كە دەكاتە%4.5.
لەلایەكی دیكەوە ئەو سەدان سەربازەی وڵاتەكەیان كە بەدرێژایی چەند ساڵی رابردوو لەئەنجامی ئۆپەراسیۆن و روبەڕوبوونەوەیان لەگەڵ هێزەكانی (پەكەكە)دا لەناوچە سنوورییەكان و لەناو قووڵایی خاكی هەرێمی كوردستاندا كوژراون یان برینداركراون، تاكە سەربازێكیش لەسنووری پارێزگای سلێمانیدا نەبووە.
–ئەگەر مەودای نێوان سەربازگەكانی توركیا لە (شێلادزێ، ئامێدی، بامەڕنی، كانی ماسێ، باتوفا) لەگەڵ بنكەو بارەگاكانی (پەكەكە) لەو دەڤەرانە، بەراورد بكەین لەگەڵ مەودای نێوان بارەگاكانی یەكێتی لەگەڵ بنكە و بارەگاكانی (پەكەكە) لە سنووری قەندیل، ئەوا بارەگاكانی (توركیا) و (پەكەكە) لە سنووری پارێزگای (دهۆك) زۆر نزیكترن لەمەودای نێوان بارەگاكانی (یەكێتی) لەبارەگاو بنكەكانی (پەكەكە) لە قەندیل. بۆنموونە دووریی سەبازگەكانی توركیا لە شێلادزێ لەبنكەكانی (پەكەكە)وە بەشێوەی هەوایی لە (10) كیلۆمەتر كەمترە.
–راستییەكی دیكەی مێژوویی لای بەرپرسە باڵاكانی توركیا هەیە، كە یەكێتی هەمیشە هەوڵیداوە پەیوەندییەكی باش و هاوسەنگی هەبێت لەگەڵ وڵاتانی ئیقلیمی، لەسەر بنەمای بەژەوەندیی هاوبەش و دەست ناخاتە ناو كاروباری وڵاتانی ناوچەكە و لەگەڵ چارەسەركردنی دۆزی كوردە بەشێوەیەكی ئاشتییانە و دیموكراسییانە و بەكارهێنانی زمانی دانوستان، دوور لە بەكارهێنانی چەك و توندوتیژیی و ئەوەی بە تاكە بژاردە زانیووە بۆ گەیشتن بە چارەسەر.
ئەم هەڵسەنگاندن و راڤەكردنە و خستنەڕووی داتاو بەڵگەنامەكان، سەلمێنەری ئەو راستییەن كە نە پەكەكە كاریگەریی بەسەر سلێمانییەوە هەیەو نە سلێمانی و یەكێتی مەترسین بۆسەر توركیا.
ئەی توركیا چی لە یەكێتی دەخوازێت؟، بۆچی تۆمەتباری دەكات؟، بۆچی توركیا یان راستتر بڵێین حزبی (داد و گەشەپێدان) پەیوەندییەكانی خۆی لەگەڵ یەكێتیدا ئاسایی ناكاتەوە؟
ئەگەرچی نیگەرانی و هەڵوێستە توندەكانی توركیا دژبە یەكێتی بە رووكەش پەیوەست بێت بە پرسی (پەكەكە)وە، بەڵام لە ناوەڕۆكدا بۆ هۆكاری دیكە دەگەڕێتەوە.
ئەجیندای توركیا لەهەرێم
هۆكارێكی سەرەكیی ئاڵۆزكردنی پەیوەندیی نێوان توركیا و یەكێتی، پەیوەستە بە ئەجێندا و ستراتیژی توركیا بەرامبەر بە ئایندەی هەرێمی كوردستان و ناوچەكە بەگشتی و دەیەوێت پاساوێك بدۆزێتەوە بۆئەوەی شەرعییەتێك بەخۆی بدات و لە رووی سەربازیی و ئەمنییەوە پێگەی خۆی لە هەرێمی كوردستان و ناوچەكە فراوانتر و بەهێزتر بكات.
توركیا لەو بڕوایەدایە كە تێڕوانینی یەكێتی بۆ ئایندەی دەڤەرەكە لەگەڵ خواست و ئەجێنداكەی ئەو وڵاتەدا یەكانگیر نین.
هەڵبژاردنەكانی توركیا و پەیوەندیی نێوان یەكێتی و ئەكەپە
هەڵبژاردنەكانی پێشوتری پەرلەمانی توركیا لەم قۆناغەدا كاتێ (هەدەپە) توانیی سەركەوتن بەدەست بهێنێت، ئەو سەركەوتنە نەك بۆ ئاكەپە سوپرایزێكی دڵخۆشكەرانە نەبوو، بەڵكو حزبی ناوبراو هەموو تواناكانی خۆی خستەگەڕ بۆ لێدان و لاوازكردنی (هەدەپە) و دەستگیركردنی پەرلەمانتار و سەرۆكی شارەوانی و سەركردە و كادرانی ئەو حزبە و دژایەتیكردنی ئەو لایەنانەش كە لەكاتی بانگەشەی هەڵبژاردندا پشتگیریی هەدەپەیان دەكرد، ی.ن.ك یەكێك بووە لەو لایەنانەی بە شێوەیەكی فراوان و مەیدانی و لە چوارچێوەی چەندین تیمدا لەتوركیا لە بەرژەوەندیی هەدەپە بەشداریی لە بانگەشەی هەڵبژاردنەكانی ئەو وڵاتەدا دەكرد، هەروەك بەڕاشكاوانە پەیامی میدیا و هەندێك سەركردەی یەكێتی بۆ پشتگیریی و سەرخستنی لیستی (هەدەپە) بوو.
لەسەر ئەو پشتگیرییەی یەكێتی لە (هەدەپە)، ئەكەپە لەسەر بنەمای پەندێكی پێشینان كە دەڵێت: (دۆستی ناحەزم، ناحەزمە). دژایەتی خۆی بۆ یەكێتی دەربڕی.
هەرچەندە وەكو بەشێك لە پرۆسەی دیموكراسی و وەكو ئەركێكی نەتەوەیی ئەم كارەی یەكێتی بە دەستكەوتێكی مێژوویی هەژمار دەكرێت، بەڵام دەبێ ئەو راستییەش بڵێین كە راستە ئەم جۆرە بڕیارە بۆ وڵاتێكی دیموكراتی شتێكی زۆر ئاساییە، بەڵام بۆ ئەو وڵاتانەی كە نادیموكراتین و كێشەی نەتەوەیی و ئاینی و مەزهەبیان هەیە و ئیرادەی توندوتیژیی زاڵە بەسەر زمانی دانوستاندن و ئیرادەی ئاشتیدا، پێویستی بە هەڵوێستە و بیركردنەوەیەكی قووڵتر هەیە لەسەر چۆنێتیی یارمەتیدانی لایەنێكی دۆست، یارمەتییەكە بەشێوەیەك بێت كە دەستكەوتەكانی زیاتربێت لە زیانەكانی و بشتوانێت بەردەوامبێت لەسەر ئەو یارمەتیدانە.
شۆڕشی رۆژئاڤا و زیاتر ئاڵوزبوونی پەیوەندییەكان
شۆڕشی رۆژئاڤای كوردستان لەدژی تیرۆریستانی داعش و بەردەوامیی یەكێتی لە پشتگیریی و یارمەتیدانی رۆژئاڤا، وەكو بەشێك لە هاوپەیمانیی نێودەوڵەتی بۆ لەناوبردنی تیرۆریستان و كردنەوەی نووسینگەی كانتۆنەكانی رۆژئاڤا لە سێمانی، پاشان دەستپێكردنی ئۆپەراسیۆنەكانی توركیا بۆ ناو رۆژئاڤای كوردستان، گرێیەكی دیكەیە لە ئاڵوزكردنی پەیوەندییەكانی یەكێتی و توركیا، لەم قۆناغەداشدا سیاسەتی توركیا و یەكێتی هاوتەریب نەبوو، دیدگا و تێگەیشتنی یەكێتی سەبارەت بە پرسی رۆژئاڤا لەگەڵ خواست و بەرنامەی توركیادا جیاوازبوو، توركیا وەكو بەشێك لە (پەكەكە) مامەڵە لەگەڵ شەرڤانانی رۆژئاڤادا دەكات، بۆیە توركیا نەك هەر لەسەر هەمان سیاسەتی پێشووی خۆی بەرامبەر بە یەكێتی بەردەوام بوو، بەڵكو ئاستی پەیوەندییەكانی گەیشتە جورێك بەبنبەست گەیشت.
ئۆپەراسیۆنەكانی توركیا بۆ ناو هەرێم و هەڕەشەكان لە یەكێتی
قۆناغی دەستپێكردنی ئۆپەراسیۆنەكانی توركیا بۆ ناو خاكی هەرێمی كوردستان، هەرچەندە ئۆپەراسیۆن و شەڕەكان لە سنووری دهۆك و هەولێر بوون، بەڵام هەڕەشەكانی توركیا زیاتر لە سلێمانی و یەكێتی بوون، ئەمەش بەهانە و قەبارەی نیگەرانییەكانی توركیا لە یەكێتی دەردەخات،كە ئاڵوزبوونی پەیوەندییەكانی لەگەڵ یەكێتی گەیشتۆتە چ رادەیەك. لەم قۆناغەدا توركیا بەشێوەیەكی راشكاوانەتر لە جاران بەهانە بە یەكێتی دەگرێت و دەیەوێت شەرعییەتێك بە خۆی بدات بۆ داگیرساندنی گڵۆپی سەوز كە خۆی شۆڕبكاتەوە ناو هەموو شارە گەورەكانی باشووری كوردستان.
ئەمەش لەكاتێكدایە كە بەهۆی زیادبوون و فراوانبوونی قەڵەمڕەویی توركیا بەسەر هەندێك وڵاتی خۆرهەڵاتی ناوەڕاستەوە، خەریكە جیهانی عەرەبی و وڵاتانی ئیقلیمی و بەشێك لە وڵاتانی جیهان بەگشتی بەسەر دوو ئاراستە و دوو بەرەدا دابەش دەبن.
–بەرەی یەكەم هەڤاڵبەند و هاوپەیمانی توركیان.
–بەرەی دووەم ئەو لایەنانەن كە دژایەتیی سیاسەتی توركیا لە ناوچەكە دەكەن و دەیانەوێت رێگریی لە فراوانبوونی بازنەی هەژموونی توركیا بكەن.
هەرێمی كوردستانیش بە یەكێك لە ناوچە گرنگ و ستراتیژییەكان بۆ هەردوو بەرە لەقەڵەم دەدرێت، بەتایبەتی بۆ توركیا، بۆیە توركیا دەیەوێت بڕیاری پێشوەختە بدات لەسەر ئەوەی كام لایەنی هەرێم بە دۆست و هاوپەیمانی خۆی بزانێت و كام لایەنیش لە دەرەوەی بازنەی هاوپەیمانیی خۆی سەیر بكات، بەهانە و تۆمەت بەخشینەوەكانی توركیا بەرامبەر بە یەكێتی، ئاماژەن بۆ ئەو خواستەی توركیا كە هێشتا بەهەمان سیاسەتی جارانەوە دەڕوانێتە پەیوەندییەكانی خۆی لەگەڵ یەكێتی و لە دەرەوەی بازنەی هاوپەیمانەكانی خۆی مامەڵە لەگەڵ یەكێتیدا دەكات.
دەرەنجامەكان
– لەدوای نەخۆشكەوتن و ماڵئاواییكردنی سەرۆك مام جەلال، پەیوەندییەكانی نێوان یەكێتی و توركیا لە چەند وێستگە و قۆناغێكی جیاوازدا، جۆرێك لە ئاڵۆزیی و دابڕانی بەخۆیەوە بینیووە.
–نە یەكێتی لەژێر كۆنترۆڵی پەكەكە-دایەو نە سلێمانی مەترسییە لەسەر توركیا، نیگەرانی و بەهانەكانی توركیا لە یەكێتی بەڕووكەش لەسەر (پەكەكە)یەو لە ناوەڕۆكدا بۆ شەرعییەتدانە بەخۆی تا ئەجێندای خۆی لەناوچەكەدا جێبەجێبكات و هەژمونی خۆی بەسەر هەموو پارێزگاكانی هەرێمدا بسەپێنێت.
–توندبوونی ناكۆكییەكانی نێوان ئەكەپە و هەدەپە هۆكارێكە كە توركیا وەكو دۆستێكی هەدەپە و ركابەرێكی خۆی مامەڵە لەگەڵ یەكێتی بكات و هەر لەسەر ئەو بنەمایەش پێداچوونەوە بە پەیوەندییەكانی خۆیدا بكات لەگەڵ یەكێتی.
–هاوشێوەی باكووری كوردستان، توركیا بەهۆی پشتیوانیی یەكێتی لە رۆژئاڤای كوردستان لەدژی داعش، هەڵگری پەیامێكی توندە بەرامبەر بە یەكێتی.
–هەوڵەكانی یەكێتی بۆ گەیشتن بە رێكەوتن لەنێوان هەرێم و بەغدا، لەلایەن توركیاوە پێشوازیی لێ ناكرێت، ئەم هەڵوێستە توندەی توركیا لەكاتێكدایە كە هیچ وڵاتێك هێندەی توركیا قسە لەسەر یەكپارچەیی خاكی عیراق ناكات و تەنانەت ناوی هەرێمی كوردستانیش بە «باكووری عیراق» دەهێنێت، كەچی دژایەتیی ئەو لایەنە سیاسییانەی هەرێم دەكات كە دەیانەوێت لەگەڵ عیراقدا بگەنە رێكەوتن و چارەسەركردنی كێشەكان بەپێی دەستووری عیراق.
–ئەگەر توركیا راستەوخۆ پەیوەندییەكانی لەگەڵ یەكێتی ئاسایی نەكاتەوە، ئەوا تا پەیوەندیی نێوان (ئاكەپە) و (هەدەپە) ئاسایبوونەوە بەخۆیەوە نەبینێت، پێناچێت توركیا جدی بێت لە ئاساییكردنەوەی پەیوندیی خۆی لەگەڵ یەكێتی و دۆخی ئێستای ناوخۆی توركیاش بە ئەندازەیەك ئاڵوزبووە كە ئاسایبوونەوەی پەیوەندیی نێوان (ئەكەپە) و(هەدەپە) بە جۆرێك لە مەحاڵ ببینرێت.
–تا پەیوەندیی نێوان یەكێتی و توركیاش ئاسایی نەبێتەوە، پێناچێت توركیا گڵوپی سەوز دابگیرسێنێت بۆ هاوپەیمانەكانی خۆی لە هەرێمی كوردستان و كەركوك، تا لەگەڵ یەكێتی بگەنە رێكەوتنێكی كۆتایی و دۆزینەوەی چارەسەرێكی ریشەیی لەناوخۆی هەرێم و ناوچە دابڕێنراوەكانی كوردستاندا.
–راستە ئاساییكردنەوەی پەیوەندییەكانی نێوان توركیا و یەكێتی زۆر قورسە و پێویستی بە ئیرادەیەكی بەهێز و هەوڵیكی زۆرە، بەڵام بەهەمان ئەندازەش ئاساییبوونەوەی پەیوەندییەكان پێویستی و گرنگیی خۆی هەیە، بەكردنەوەی گرێی ئەو پەیوەندییانە، یەكێتی دەتوانێت وەكو سەردەمی سەرۆك مام جەلال روڵێكی ئەرێنی بینێت كە خزمەت بە سەرلەنوێ زیندووكردنەوەی پرۆسەی ئاشتی بكات، ئەمەش لە بەرژەوەندیی هەموو لایەنەكاندا دەبێت، بە هەرێمی كوردستانیشەوە.
*ئەندامی ئەنجومەنی سەركردایەتی ی.ن.ك

وتاری زیاتر




دوژمنمان کەمە نۆرەی لیبیایە!‬ لەتیف نێروەیی
2020-04-18 16:46      137 جار بینراوە


نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو